Tipo de manifestación escénica que acontece en espazos públicos abertos e que pode ser itinerante ou de representación estática, que busca un rol dinámico da persoa espectadora, pois pode aparecer espontaneamente na súa vida cotiá e provocar calquera tipo de chamada, interacción ou relación paródica.
Podemos establecer distintos tipos de artes escénicas de rúa:
As artes de rúa tiveron un forte auxe nos anos 60 do século XX, grazas aos movementos sociais e manifestacións estudantís. O teatro agit-prop e o teatro político botaron man destas artes que saían dos espazos privilexiados para tomar contacto co pobo e realizar intervencións creativas. Así, naceron compañías paradigmáticas coma Bread and Puppet, San Francisco Mime Troupe, etc. Estruturas e marionetas móbiles xigantes, carros, zancos, mimos, pero tamén artes do movemento en espazos coma paredes de edificios (danza vertical) ou a complicidade homorística e irónica.
Na actualidade, o teatro de rúa ten moito desenvolvemento e diversidade e apoios notables en culturas coma a do País Vasco, que conta cunha asociación profesional de Artes de Rúa, Artekale. Comparten coa Federación francesa de Artes de Rúa (país que destaca especialmente polo apoio e a calidade neste ámbito) o seguinte manifesto:
Existimos porque é necesario
Nacemos hai 2500 anos
A xente encóntranos por casualidade, ás veces sen sabelo
Actuamos para todos os ollos e orellas
Ocupamos todo tipo de lugares: rúa, descampados, bosques
Campos, patios de veciños, cidades e aldeas….
Dinnos que somos de rúa, é o noso escenario, o noso ring, a nosa elección,
Cultivamos a rúa
Artistas, autores, programadores, técnicos…
Nestes días, cando o mercado o ocupa todo
Cando se provoca o medo para facernos susurrar e poñernos orelleiras,
Cando as distancias aumentan, os letreiros e as barreiras se multiplican,
Cando se roga seguir sen deterse
Reivindicamos alto e claro que hai cousas que ver,
Que compartir, que coñecer,
Centenares de festas e citas, millóns de artistas, millóns de espectadores,
Algo que nós,
Artistas cidadáns inscritos na cidade nos esforzamos en construír, ¡día a día!
Reivindicamos o dereito de vivir do noso oficio
Cremos que a arte pode salvar o mundo,
Pero primeiro e antes que nada
Que se desenvolva
Nunha rúa libre….
En Galicia, o teatro de rúa conta cunha importante tradición que arrinca xa nos anos setenta e á que se sumaron compañías importantes coma Teatro Entroido, con espectáculos dirixidos por Roberto Vidal Bolaño.